A programación da fin de semana comezou o venres 2 de marzo de 2018 co 12º concurso de Tapas e Petiscos, organizado polo Consello Regulador da Denominación de Orixe Protexida Arzúa-Ulloa. De 18 h. a 23.30 h., puidéronse degustar en 23 establecementos de hostalaría de Arzúa as tapas creadas, que participan competindo en calidade, orixinalidade e presentación final. “Carrilleiras de porco con queixo Arzúa-Ulloa” de Casa Chelo foi a gañadora do 1º premio. O 2º posto foi para o “Queixo Celta”, de Casa Nené, e o 3º para “Saquiño de queixo con gambas” da cafetería Praza.

O xurado que percorreu os dez establecementos finalistas estivo constituído polo cociñeiro André Arzúa (A Fábrica de Vilanova, Espazo Gastronómico Abellia); Elena Quián, profesora de Servizos de Restauración e xefa do Departamento de Acreditación e Probas no CIFP Paseo das Pontes; Óscar Miranda, cociñeiro e colaborador de Radio Arzúa; Salomé Beiroa, membro do panel de cata dos queixos galegos, e Óscar Pérez Ramil, secretario-xerente do consello regulador. Dado o elevado número de locais participantes, foi necesaria unha cata previa. Nesta preselección o xurado formouno o profesorado dos ciclos de panadaría, confeitaría e repostaría e alumnos dos ciclos de Xestión de vendas e espazos comerciais e de actividades comerciais da EFA Piñeiral de Arzúa, acompañados por persoal do consello regulador.